Malisheva befason kampionin në fuqi
Në një mjaft interesante në kuadër të xhiros së katërt të elitës së futbollit kosovar, Malisheva arriti të triumfojë ndaj kampionit në fuqi, Ballkanit, me rezultat 3:2 në stadiumin “Liman Gegaj”. Ky rezultat vjen si një surprizë e madhe, duke pasur parasysh se skuadra vendase luajti pjesën më të madhe të ndeshjes me një lojtar më pak.
Ndeshja filloi me një intensitet të lartë, dhe Malisheva ishte e para që kaloi në epërsi. Arbër Prekazi shënoi në minutën e 14-të, duke i dhënë avantazhin skuadrës së tij me një goditje të saktë me kokë nga afërsia. Ballkani arriti të barazojë rezultatin në minutën e 28-të, kur sulmuesi Sunday Adetunji, pas një asistimi nga Queven Inacio, shënoi gjithashtu me kokë.
Në fund të pjesës së parë, Malisheva mbeti me një lojtar më pak pas përjashtimit të mesfushorit Etnik Brruti, i cili mori dy kartonë të verdhë brenda pak minutash. Pavarësisht këtij hendeku numerik, Malisheva tregoi karakter të fortë në pjesën e dytë.
Në minutën e 61-të, Drilon Hazrollaj shënoi për epërsinë e dytë të Malishevës, duke sjellë rezultatin në 2:1, derisa Fatjon Bunjaku shënoi për 3:1 nga afërsia në minutën e 73-të. Kjo ishte një goditje befasuese për Ballkanin, që priste ta kishte situatën nën kontroll pas përjashtimit të lojtarit të Malishevës.
Ballkani arriti të shënojë në minutën e 91-të me golin e Queven Inacios, i cili shënoi për të ngushtuar rezultatin në 3:2. Megjithatë, koha nuk ishte e mjaftueshme për kampionët që të shmangnin humbjen.
