Kosova i nis përgatitjet për dy ndeshjet vendimtare të kualifikimeve të Botërorit

Kombëtarja e Kosovës e ka nisur sot grumbullimin për dy ndeshjet e fundit dhe vendimtare në kuadër të kualifikimeve për Kampionatin Botëror 2026, që do të zhvillohet në SHBA, Kanada e Meksikë.

Seanca e parë stërvitore u mbajt në stadiumin “Fadil Vokrri” në Prishtinë, nën drejtimin e përzgjedhësit Franco Foda. Në këtë seancë morën pjesë dhjetë futbollistë: Visar Bekaj, Faton Maloku, Ilir Krasniqi, Leard Sadriu, Mërgim Vojvoda, Veldin Hoxha, Valon Berisha, Milot Rashica, Edon Zhegrova dhe Fisnik Asllani.

Pjesa tjetër e lojtarëve të ftuar nga përzgjedhësi Foda bëri rigjenerim në palestër në hotel, pas ndeshjeve të zhvilluara me klubet e tyre përkatëse gjatë fundjavës.

Dardanët do të përballen të shtunën në Lubjanë me Slloveninë, ndërsa të martën e ardhshme do të mbyllin ciklin kualifikues me ndeshjen ndaj Zvicrës në “Fadil Vokrri”.

Pas shtatë ndeshjeve të zhvilluara, Kosova ndodhet në vendin e dytë të grupit me shtatë pikë, tri më pak se Zvicra lidere. Sllovenia renditet e treta me tri pikë, ndërsa Suedia është e fundit me një pikë.

Vendi i parë i grupit siguron kualifikimin direkt në Botëror, ndërsa skuadra e vendit të dytë do të ketë mundësinë të garojë në fazën e ‘play-off’-it. Për të siguruar ‘play-off’-in Kosovës i duhet vetëm një pikë, derisa ekzistojnë edhe mundësitë e kualifikimit direkt, por gjithçka do të vendoset në dy xhirot e fundit të këtij grupi.

Seancën e radhës stërvitore Dardanët e zhvillojnë, të martën, në orën 11:00.