Fitorja e parë e Suharekës në Superligë, e mposht Dukagjinin

Suhareka ka shënuar fitoren e saj të parë në Superligën e Kosovës, duke mposhtur Dukagjinin me rezultatin 3:1 në një ndeshje të zhvilluar të shtunën në stadiumin e qytetit të Suharekës. Ndeshja u karakterizua nga shumë raste për shënim dhe disa gola të anuluar pas rishikimit në VAR.

Në pjesën e parë, golat e Jakup Berishës për Suharekën dhe Hekuran Berishës për Dukagjinin u anuluan nga gjyqtari. Megjithatë, të dy futbollistët arritën të shënojnë në pjesën e dytë.

Pesë minuta pas fillimit të pjesës së dytë, Mevlan Zeka shënoi nga afërsia për t’i dhënë epërsinë ekipit të Suharekës. Gëzimi i vendasve zgjati vetëm tre minuta, pasi Hekuran Berisha barazoi rezultatin për Dukagjinin.

Afro 20 minuta para përfundimit të ndeshjes, Jakup Berisha riktheu epërsinë për Suharekën me një gol tjetër, duke e çuar skuadrën e tij drejt fitores. Në minutat e fundit, kapiteni Mevlan Zeka shënoi nga pika e penalltisë, duke vulosur rezultatin përfundimtar 3:1.

Kjo ishte disfata e dytë radhazi për Dukagjinin, të drejtuar nga trajneri Ismet Munishi, i cili nuk ishte i pranishëm në bankinë për shkak të një kartoni të kuq të marrë në ndeshjen hapëse të edicionit të ri të Superligës, por dha instruksione për shtabin e tij nga tribunat.

Në javën e tretë të kampionatit, Suhareka do të udhëtojë për t’u përballur me Dritën, ndërsa Dukagjini do të presë Gjilanin në Klinë.