Drita mposhtet, por mbetet në garë për kalim tutje
Drita e ka humbur ndeshjen e parë të rrethit të tretë kualifikues të Ligës së Konferencës, por mbetet ende në garë për kalim tutje.
Skuadra gjilanase të enjten u mposht në udhëtim tek Auda e Letonisë me rezultatin 1:0, në “Skonto stadions” të Rigas.
Sfidën e ka vendosur goli i hershëm i shënuar nga vendësit.
Në minutën e tetë, mbrojtësi portugez, Bruno Tavares, shënoi nga gjuajtja e lirë në portën e portierit Faton Maloku.
Humbja 1:0 e lë Dritën me gjasa për ta kaluar edhe këtë kundërshtar.
Në plejofin e Ligës së Konferencës, nëse avancon tutje, Drita do të ballafaqohej me fituesin e ndeshjes Brondby – Legia Varshava.
Ndeshja kthyese zhvillohet pas një jave në stadiumin “Fadil Vokrri” në Prishtinë.
