Disfatë e hidhur për Kosovën, Letonia fiton në “Fadil Vokrri”
Ekipi kombëtar i futbollit të femrave të Kosovës ka pësuar një humbje të ngushtë 1-0 ndaj Letonisë në ndeshjen e zhvilluar të martën pasdite në stadiumin “Fadil Vokrri” në Prishtinë. Kjo ndeshje ishte e vlefshme për xhiron e dytë të Grupit 6 të Ligës C të Ligës së Kombeve.
Goli i vetëm i ndeshjes u shënua nga Viktorija Zaicikova në minutën e 51-të, duke i dhënë fitoren ekipit letonez. Një moment kontrovers ndodhi në pjesën e dytë, kur goli i Donjeta Halilajt u anulua, duke shkaktuar reagime nga tifozët dhe ekipi kosovar.
Kosova e kishte nisur Ligën e Kombeve me një fitore të thellë 4-0 ndaj Maqedonisë së Veriut në ndeshjen e parë, por në duelin e sotëm hasi në kundërshtar dukshëm më të përgatitur. Pas kësaj xhiroje, Letonia renditet në vendin e parë të grupit me 6 pikë, ndërsa Kosova ndodhet në vendin e dytë me 3 pikë.
Kjo humbje ishte një zhgënjim për ekipin kosovar dhe tifozët e saj, por ata do të kenë mundësinë të rikthehen në ndeshjet e ardhshme të Ligës së Kombeve.
