Club Brugge kryeson tri herë, por Barcelona shpëton nga humbja falë VAR-it!
Një ndeshje spektakolare është zhvilluar në Belgjikë, ku Club Brugge dhe Barcelona ndanë pikët pas barazimit dramatik 3:3 në raundin e katërt të Ligës së Kampionëve.
Skuadra belge ishte pranë një fitoreje historike, pasi kryesoi plot tri herë gjatë ndeshjes, por në fund VAR-i shpëtoi Barcelonën nga një disfatë befasuese.
Vetëm pas gjashtë minutash lojë, Tresoldi zhbllokoi rezultatin për vendasit, por Ferran Torres barazoi menjëherë dy minuta më vonë. Në minutën e 17-të, Forbes riktheu epërsinë për Club Brugge (2:1), rezultat me të cilin u mbyll pjesa e parë.
Spektakli vazhdoi edhe në pjesën e dytë. Lamine Yamal barazoi në minutën e 61-të (2:2), por vetëm tre minuta më vonë Forbes realizoi sërish për 3:2, duke ndezur entuziazmin në “Jan Breydel Stadium”.
Megjithatë, fati nuk ishte me belgët deri në fund. Në minutën e 74-të, Tsolis shënoi një autogol fatkeq, që i dha Barcelonës barazimin e tretë të ndeshjes (3:3).
Në shtesë, vendasit menduan se kishin siguruar fitoren pas një goli të Vermant, i cili ia rrëmbeu topin portierit Szczęsny dhe dërgoi topin në rrjetë. Por pas shqyrtimit të gjatë me VAR, arbitri Anthony Taylor anuloi golin për shkak të një faulli në aksionin paraprak.
Në fund, Barcelona shpëtoi me shumë fat nga humbja, ndërsa Club Brugge konfirmoi formën e shkëlqyer me një tjetër paraqitje të denjë për t’u duartrokitur.
