Albion Rrahmani me formë mbresëlënëse, shënon sërish me Spartën e Pragës
Albion Rrahmani po vazhdon të lërë gjurmë të mëdha në Spartën e Pragës, duke treguar një tjetër performancë të shkëlqyer në kampionatin çek. Sulmuesi 24-vjeçar nga Kosova, i cili u transferua gjatë afatit kalimtar veror nga Rapidi i Bukureshtit, po e mban nivelin e lartë të lojës edhe në këtë kapitull të ri të karrierës së tij.
Pas debutimit të tij të suksesshëm në kualifikimet e Ligës së Kampionëve, ku shënoi një gol vendimtar në fitoren 2:0 ndaj Malmos, Rrahmani ishte titullar të shtunën në ndeshjen e xhiros së shtatë të kampionatit çek. Sparta e Pragës siguroi një fitore të pastër 2:0 në udhëtim ndaj Hradec Kralove, me Rrahmanin që ishte protagonist kryesor.
Rrahmani e nisi ndeshjen fuqishëm, duke asistuar në minutën e tetë për Lukáš Haraslin, i cili shënoi golin e parë për Spartën. Në fundin e pjesës së parë, Rrahmani e dyfishoi avantazhin me një gol të shënuar pas asistimit të bashkëkombësit të tij, Ermal Krasniqi.
Pavarësisht largimit të tij nga loja në minutën e 50-të, ndikimi i Rrahmanit në ndeshje ishte i qartë. Krasniqi u zëvendësua më vonë në minutën e 65-të, por ekipi ruajti avantazhin dhe siguroi tri pikët.
Me këtë fitore, Sparta e Pragës kryeson tabelën e kampionatit çek me 19 pikë pas shtatë ndeshjeve, duke treguar formën e shkëlqyer të ekipit. Rrahmani është thirrur në listën e trajnerit Franco Foda për dy ndeshjet e shtatorit në Ligën e Kombeve kundër Rumanisë dhe Qipros.
