Fisnik Asllani, një tjetër talent që po shkëlqen në Gjermani

Një tjetër talent me prejardhje nga Kosova po shkëlqen këtë edicion në futbollin e Gjermanisë. Bëhet fjalë për 20-vjeçarin, Fisnik Asllani. Ai është pjesë e skuadrës së dytë të Hoffenheimit, që bën gara në Ligën Regjionale të Gjermanisë.

Në ndeshjen e mbrëmshme kundër Aalenit, ai shënoi golin e fitores në minutën e 85-të, duke bërë që Hoffenheim II të jetë shumë afër kalimit të Bundesliga 3. Fisniku ka luajtur edhe me skuadrën e parë në Bundesliga 1 në këtë edicion, por për të fituar sa më shumë eksperiencë dhe për të pasur sa më shumë minutazh aktive, drejtuesit e klubit kanë vendosur ta përfshijnë në skuadrën e dytë, njëherësh edhe për t’i ndihmuar në arritjen e objektivit për promovim në një rang më të lartë të garave.

Aktualisht Fisnik Asllani është pjesë e Kombëtares së Gjermanisë U20. Gjithsesi, ai është edhe nën vëzhgimin e përfaqësuesit të FFK-së në Gjermani, Fekmi Konxheli dhe në të ardhmen mund të bindet për të veshur sërish fanellën e Kombëtares së Kosovës, pasi më parë ishte pjesë e Kombëtares dardane U17.