Ademi pret babanë e Granitit: Familja Xhaka, simbol i vlerave dhe atdhedashurisë

Presidenti i Federatës së Futbollit të Kosovës, Agim Ademi, ka pritur sot në zyren e tij, Ragip Xhakën, babain e yllit kosovar të Arsenalit, Granit Xhaka.

I pari i futbollit tonë, përmes llogarisë së tij në Facebook, ka shkruar për takimin me Ragip Xhakën. Ademi ka thënë se më kënaqesi të madhe e ka pranuar fanellën e Granitit, të cilit i ka uruar sukses në rrugëtimin me Arsenalin në garën për titull të kampionit në Premier League.

Ky është postimi i Ademit:

Sot në selinë e Federatës së Futbollit të Kosovës prita një mysafir të veçantë – Ragip Xhakën, babanë e një prej futbollistëve më të shquar të Arsenalit dhe të Kombëtares së Zvicrës, Granit Xhaka.

Me kënaqësi të madhe e pranova fanellën e Granitit me nënshkrimin e tij, të cilën do ta ruaj si një dhuratë të çmuar në koleksionin tim të futbollit.

Ragipi më përgëzoi për punën e deritanishme në krye të FFK-së dhe shprehu shpresën që Kosova do të arrijë kualifikimin në Kampionatin Evropian së bashku me Zvicrën.

Me këtë rast, Granitit i dërgova urimet më të mira, duke shprehur shpresën që sivjet do të arrijë ta fitojë titullin e kampionit me Arsenalin në Ligën Premiere dhe do të vijojë të shkëlqejë në fushën e futbollit edhe për shumë vjet.

Familja Xhaka ka qenë dhe mbetet simbol i vlerave dhe atdhedashurisë, teksa Graniti është promovues i jashtëzakonshëm i vlerave të Kosovës dhe frymëzues për të rinjtë në mbarë botën për të ndjekur ëndrrat e tyre në futboll.