Trepça 89′ do fitojë 180 mijë euro për shitjen e Christian Mba tek Partizani!

Partizani e ka gjetur pasuesin e Xhuljano Skukës. Të kuqtë kishin shënjestruar sulmuesin e Trepca 89′, Christian Mba, i cili ka bërë një edicion të shkëlqyer në kampionatin kosovar. Burime të SuperSport tregojnë detajet e marrëveshjes, me klubin e kuq që do të bëjë një nga blerjet më të shtrenjta të kampionatit shqiptar.

“Demat” do të paguajnë 180 mijë euro për sulmuesin, i cili do të nënshkruajë një kontratë për 3 vite e gjysmë. Sulmuesi 23-vjeçar ka shkëlqyer gjatë këtij edicioni, teksa ka shënuar 10 gola e ka dhënë 5 asistime në 18 paraqitje, duke qenë lideri i skuadrës.

Stafi teknik i të kuqve ka dhënë pëlqimin për lojtarin. Mba u transferua sezonin e shkuar në Kosovë, ndërsa tashmë ka mundësinë për të bërë një tjetër hap para, teksa Partizani shihet si një trampolinë për të. Të kuqtë morën 1.4 milionë euro nga shitja e Skukës, ndërsa kanë menduar që të investojë një pjesë të shumës tek nigeriani, i cili ka perspektivë dhe drejtuesit shpresojnë që të prërsërisin suksesin që patën me sulmuesin dibran.

Marrëveshja mes palëve dhe lojtarit është arritur dhe shumë shpejt pritet që lojtari të prezantohet dhe të bashkohet me skuadrën e Partizanit, për të qenë i gatshëm që për ndeshjen e radhës.