Mastantuono premton sezon të madh me Fiorentinën: Batistuta është legjendë, Bellingham idhulli im
Franco Mastantuono beson se Fiorentina mund të zhvillojë një sezon të suksesshëm dhe nuk e fsheh admirimin për legjendën e klubit, Gabriel Batistuta.
Futbollisti argjentinas, i cili është i huazuar nga Real Madridi te Fiorentina, ka folur në një intervistë për serialin “MySkills” të DAZN-it, të realizuar në bashkëpunim me EA Sports FC 27.
Mastantuono kujtoi fillimisht rekordin e tij si golashënuesi më i ri që ka realizuar një tregolësh në pesë ligat kryesore evropiane, duke tejkaluar Lionel Messin.
“Të shohësh emrin tënd përkrah atij të Messit në librat e rekordeve është diçka surreale. Të ndash një rekord të tillë me të është gjëja më e mrekullueshme që mund të ndodhë”, u shpreh argjentinasi.
Ai foli edhe për Fiorentinën dhe ish-sulmuesin legjendar Gabriel Batistuta, me të cilin ka pasur mundësinë të bisedojë.
“Batistuta është një legjendë. Pata mundësinë të flisja me të dhe ai u shpreh me shumë konsideratë për Fiorentinën. Serie A më pëlqen shumë, është një kampionat ku çdo ekip është i fortë. Na duhet ende të përmirësohemi, por duke punuar fort, jam i bindur se do të jetë një sezon pozitiv për ne”, deklaroi Mastantuono.
Argjentinasi kujtoi gjithashtu kohën te River Plate, veçanërisht emocionet e përballjeve me rivalin e përjetshëm Boca Juniors.
“Kur isha te Riveri, mezi prisja të luaja kundër Bocas. Për mua, ishte një mënyrë për t’iu përgjigjur asaj që njerëzit thoshin për mua. Shënimi i atij goli nga goditja e dënimit ma ndryshoi jetën. Ishte një dhuratë që ma dha futbolli”, tregoi ai.
Për kalimin nga River Plate te Real Madridi, Mastantuono tha se bëhej fjalë për një hap të madh në karrierën e tij, por theksoi se ambientimi në klubin madrilen ishte më i lehtë falë pritjes që iu bë nga bashkëlojtarët.
Ai veçoi edhe Jude Bellinghamin si futbollistin që admiron më së shumti.
“Bellingham është lojtari që admiroj më shumë”, tha 17-vjeçari.
Në fund, Mastantuono u tregua modest kur u pyet nëse e konsideron veten një nga talentet e rinj më të mirë në futbollin botëror.
“Nuk jam i sigurt nëse jam një nga lojtarët e rinj më të mirë në botë. Nuk më pëlqen shumë të flas për veten. Niveli është shumë i lartë dhe është gjithmonë një përvojë e shkëlqyer të garosh kundër bashkëmoshatarëve të një kalibri kaq të lartë”, përfundoi ai.
