Bregu i Fildishtë rrëmben fitoren ndaj Ekuadorit me golin e Amad Diallos në fund
Bregu i Fildishtë e ka nisur me tre pikë kampanjën në Grupin E të Kupës së Botës 2026, pasi mposhti Ekuadorin me rezultat minimal 1:0 në një ndeshje të vendosur vetëm në çastet e fundit.
Sfida ishte e baraspeshuar dhe me raste në të dyja anët. Afrikanët rrezikuan herët përmes Bazoumana Toures, por portieri Hernán Galíndez reagoi me sukses. Në anën tjetër, Ekuadori ishte shumë pranë avantazhit në pjesën e parë, teksa John Yeboah dhe Alan Minda goditën traversën në dy raste të ndara.
Edhe pjesa e dytë solli emocione të shumta. Elye Wahi iu afrua golit për Bregun e Fildishtë, por tentativa e tij përfundoi në traversë, ndërsa Gonzalo Plata provoi nga distanca për Ekuadorin, pa arritur të mposhtë portierin Yahia Fofana.
Kur gjithçka po shkonte drejt një barazimi pa gola, Bregu i Fildishtë gjeti momentin vendimtar. Në minutën e 90-të, Wilfried Singo realizoi një depërtim të shkëlqyer nga mbrojtja, krijoi hapësirë në zonë dhe shërbeu për Amad Diallon, i cili nuk gaboi përballë portës, duke shënuar golin e vetëm të ndeshjes.
Me këtë fitore, Bregu i Fildishtë merr kryesimin e përkohshëm në grup dhe shkon me vetëbesim në duelin e radhës ndaj Gjermanisë. Ekuadori, ndërkohë, do të kërkojë reagim ndaj Curaçaos për të mbajtur gjallë shpresat për kualifikim.
