Shevchenko i zhgënjyer: Milani nuk ka vazhdimësi, mungon lideri
Andriy Shevchenko, ish-sulmuesi legjendar i Milanit dhe Chelsea, aktualisht president i Federatës së Futbollit të Ukrainës, ka analizuar situatën e Milanit para derbit të Madoninës në një intervistë për “La Stampa”.
Kritikat ndaj Milanit dhe Fonseca-s
Shevchenko ka shprehur keqardhjen për Paulo Fonseca, duke vlerësuar karakterin dhe profesionalizmin e tij: “Më vjen keq për Fonseca. E njoh, është një njeri i ndershëm dhe me vlera të larta. Më duket se ka bërë gjithçka për të zgjidhur problemet që nuk i ka sjellë ai dhe ende ekzistojnë te Milani. Shpresoj që ndryshimi i trajnerit të shërbejë për mirë. Conceição në Superkupë solli një injeksion energjie, por Milani nuk ka vazhdimësi.
Leao nuk është lider
Një nga pikat që shqetësojnë Shevchenko-n është edhe qasja e Rafael Leaos: “Nëse Leao dëshiron të jetë një lojtar i rëndësishëm dhe të shkruajë historinë e Milanit, duhet të japë shumë më tepër. Cilësitë e tij nuk diskutohen, por nuk është lider. Ai mund të bëhet i tillë vetëm nëse merr përgjegjësi. Pyetja që shtrohet është: a e dëshiron ai këtë?”
Sjellja e lojtarëve dhe filozofia e futbollit
Ish-sulmuesi ukrainas thekson se qasja e trajnerëve mund të ndryshojë, por filozofia e futbollit duhet të mbetet e qartë: “Çdo trajner ka qasjen e tij, por futbolli duhet të jetë i thjeshtë. Nuk është e pranueshme të shohësh lojtarë që ecin në fushë. Të luash për Milanin do të thotë të përballesh me presionin çdo javë dhe të përqendrohesh vetëm tek ndeshja e radhës. Kur luan për Milani, Interi apo Juventusi, ke mbështetjen maksimale dhe një stadium të mbushur që pret gjithçka nga ty. Çfarë mund të kërkosh më shumë? Kjo është bukuria e futbollit.”
Interi, një skuadër me identitet europian
Duke analizuar kundërshtrarin e Milanit, Shevchenko e vlerëson lart Interin: “Zikaltrit janë të vetëdijshëm për forcën e tyre. Skuadra është e bashkuar dhe e lidhur, me një trajner që ka pasur kohë për të vendosur vulën e tij. Kanë diçka më shumë se të tjerët dhe, pas finales së Ligës së Kampionëve në Stamboll, të luajtur në të njëjtin nivel me Manchester City, zikaltrit e dinë se mund të konkurrojnë me më të mirët.”
Derbi i Madoninës pritet të jetë një sfidë e fortë, me Milanin që kërkon të rifitojë stabilitetin dhe Interin që synon të konfirmojë dominimin e tij. Shevchenko nuk e fsheh zhgënjimin e tij për situatën e Milanit, por mbetet me shpresë se skuadra do të gjejë rrugën e duhur.
