Leverkuseni nuk ka të ndalur, 34 ndeshje pa humbje, mposht me lehtësi Kolnin

Bayer Leverkuseni po marshon drejt titullit historik në Bundesligë. Seria pa humbje e skuadrës ku lider është Granit Xhaka, tashmë ka arritur në 34 ndeshje. Rekordin prej 33 ndeshjeve, Leverkuseni e vendosi javën e kaluar, ndërsa të dielën pasdite fitoi 2:0 në derbin regjional dhe të zjarrtë ndaj Koelnit.

Ndeshja e xhiros së 24-t të Bundesligës gjermane u zhvillua në Koeln.

Gjërat u bënë më të lehta për Leverkusenin në minutën e 14-të kur me karton të kuq u përjashtua Jan Thielman i Koelnit.

Jeremie Frimpong shënoi për 1:0 në minutën e 37-të. Në minutën e 73-të golin e dytë të Bayer Leverkusenit e realizoi Alex Grimaldo. Xhaka, si zakonisht, udhëhoqi nga mesfusha lojën e Leverkusenit. Leart Paqarada u paraqit prej minutës së 69-të për Koelnin.

Leverkuseni tani udhëheq në tabelë me 64 pikë. Dhjetë më pak i ka Bayerni në pozitën e dytë. Koelni është vetëm i 16-ti me 17 pikë.