Kosova në telashe, tre futbollistë mungojnë kundër Zvicrës

Në prag të ndeshjes së sotme Zvicër-Kosovë, ekipi i Dardanëve ka telashe të mëdha. Në fakt, stafi i ekipit Kombëtar të Kosovës ka bërë të ditur se për shkak të lëndimeve dhe gjendjes së gripit, tre lojtarë do të mungojnë në ndeshjen e sotme kundër Zvicrës.

“Pas një pune të kujdesshme mjekësore dhe ekzaminimeve të detajuara, fatkeqësisht ka rezultuar që futbollistët Milot Rashica, Ermal Krasniqi dhe portieri Arijanet Muriç nuk do të jenë në gjendje të jenë në dispozicion të përzgjedhësit Primozh Gliha në këtë sfidë të rëndësishme”, thuhet në njoftimin e FFK-së.

Sipas njoftimit, Milot Rashica është lënduar në fund të stërvitjes së djeshme dhe pas ekzaminimeve mjekësore është konstatuar se ai nuk do të jetë në gjendje të luajë në ndeshjet kualifikuese kundër Zvicrës dhe Bjellorusisë. Ndërsa Ermal Krasniqi, i cili u lëndua disa ditë më herët, përkundër përkushtimit maksimal të tij dhe stafit mjekësor nuk është në gjendje për të luajtur në ndeshjen e sotme, por po bëhet përpjekje për ta riaftësuar për lojë për sfidën e ardhshme me Bjellorusinë.

Ndërkohë, portieri Arijanet Muriç po përballet me një gjendje gripale, e cila ka bërë që ai të mos jetë në gjendje të përfshihet as në stërvitjen e fundit dhe si rrjedhojë do të mungojë edhe në ndeshjen e sotme.

“Përkundër këtyre mungesave të mëdha, në kampin e Dardanëve ekziston një motiv i lartë për paraqitje dinjitoze në ‘St. Jakob-Park’. Le ta mbështesim Kombëtaren dhe të shpresojmë në rezultat pozitiv”, thuhet në njoftimin e shtëpisë së futbollit kosovar.