Sylvinho: Jam krenar që jam trajner i Shqipërisë

Selektori i Shqipërisë, Sylvinho është shprehur tejet i lumtur, por mbi të gjitha krenar me kualifikimin e kuqezinjve në “Euro 2024”.

Sylvinho ka përgëzuar të gjithë për këtë sukses, ndërsa nuk ka hezituar të thotë se ndihet më shumë se krenar që është trajner i Shqipërisë. Ai ka insistuar se Shqipëria e ka merituar këtë kualifikim, pasi ka thënë se është punuar shumë.

“Falënderoj të gjithë njerëzit që na kanë mbështetur në këtë udhëtim, pastaj lojtarët dhe gjithë të tjerët që kanë bërë një punë fantastike. Jam krenar që jam trajner i Shqipërisë dhe do ta ndjek këtë pasion të madh të njerëzve që e kanë. Nuk jam vetëm unë meritor, por edhe ndihmësit e mi dhe gjithë stafi im, me të cilët kemi bërë një punë të madhe. Kemi punuar mirë të gjithë, ka një pasion për punën që e bëjmë dhe ky pasion ndihet si në ndeshje ashtu edhe në stërvitje”, është shprehur Sylvinho.

“Ne kemi bërë një punë të mirë dhe kemi marrë rezultate të mira. Pra, është punuar shumë mirë dhe më të vërtetë e kemi merituar këtë. Moldavia nuk kishte asgjë për të humbur, luante me topa të gjatë dhe ishte vështirë për lojtarët tanë. Nuk kanë humbur asnjë ndeshje në këto kualifikime, veç humbjes në Tiranë dhe nuk e patëm aspak lehtë”, ka shtuar ai.

Tekniku nga Brazili ka thënë se momenti kur ka filluar të besojë në kualifikim ka qenë pas ndeshjes me Poloninë në Varshavë, të cilën thotë se nuk e merituan ta humbin.