Andi Zeqiri ka qenë emri më i përfolur javën e fundit si në Kosovë ashtu edhe në Zvicër.
Sulmuesi i talentuar do të jetë prurja e parë e Kombëtares së Kosovës për vitin 2020, me lojtarin që pritet të jetë i gatshëm që në sfidën kundër Maqedonisë së Veriut në Play Off e Ligës së Kombeve.
Konfirmimet për këtë vijnë nga babai i futbollistit dhe kreu i FFK-së.
Babai i futbollistit në një intervistë ekskluzive për Futbolli.info ka thënë se tashmë ekziston një marrëveshje mes Andi Zeqirit dhe presidentit të FFK-së Agim Ademi, por që nënshkrimi i saj është bllokuar shkaku i COVID-19.
Nuk vonoi shumë dhe konfirmimi erdhi edhe nga Agim Ademi, që deklaroi për Telegrafin se Andi mund të jetë i ftuari i radhës te Kosova për ndeshjen kundër Maqedonisë.
Por, këtyre konfirmimeve nuk është duke iu besuar media zvicerane ‘4-4-2.com’, që thotë se Andi Zeqiri ende nuk ka vendosur se fanellën e cilës kombëtare do ta veshë.
Sipas kësaj medie helvetike, e ardhmja e Zeqirit do të jetë e hapur deri në zhvillimin e një ndeshje konkurruese për cilëndo kombëtare.
